BAKI, 9 aprel. TELEQRAF

"Azərbaycan daha çox qaz tədarük edə bilsə, Avropa da onu almaqda çox maraqlı olacaq."

Teleqraf xəbər verir ki, bu barədə Cənub Qaz Dəhlizi Məşvərət Şurası nazirlərinin 11-ci iclası və Yaşıl Enerji Məşvərət Şurası nazirlərinin 3-cü iclasının yekunlarına dair keçirilən mətbuat konfransı zamanı Avropa İttifaqının enerji və mənzil məsələləri üzrə komissarı Dan Yorgensen qeyd edib.

Yorgensen Avropanın yaşıl enerjiyə keçidi prosesindən bəhs edib:

“Biz daha çox bərpa olunan enerji tətbiq edirik. Amma qaz hələ bir neçə il enerji mənbələrimizdən biri olacaq. Mən tam əminəm ki, əgər Azərbaycan daha çox qaz tədarük edə bilsə, Avropa da onu almaqda çox maraqlı olacaq.

Bu gün burada olmağımın səbəblərindən biri də, məhz bu məsələnin reallaşması üçün nə edə biləcəyimizi müzakirə etməkdir. Təbii ki, bu məsələ Avropa Komissiyası ilə Azərbaycan hökuməti arasında daha da müzakirə olunacaq. Amma eyni zamanda bu məsələ ayrı-ayrı üzv dövlətlər, şirkətlər, vətəndaş cəmiyyəti təşkilatları və digər tərəfdaşlarla da müzakirə olunacaq”.