BAKI, 9 noyabr. TELEQRAF
Ağ Evin xüsusi elçisi Stiv Uitkoff ilə birlikdə Ukrayna münaqişəsinin nizamlanması üzrə Əbu-Dabidə keçiriləcək üçtərəfli danışıqlardan əvvəl Ukrayna Avropa İttifaqı (Aİ) və NATO nümayəndələri ilə görüşəcək.
Teleqraf xəbər verir ki, bunu ABŞ Prezidentinin kürəkəni Cared Kuşner özünün "X" sosial şəbəkə hesabında bildirib.
"Əbu-Dabidə Ukrayna və Rusiya ilə iki günlük üçtərəfli danışıqlar başlamazdan əvvəl biz xüsusi elçi Stiv Uitkoff ilə birlikdə Ukrayna, Aİ, NATO, Almaniya, Fransa, Böyük Britaniya və İtaliyadan olan tərəfdaşlarımızla bir araya gələcəyik", - C.Kuşner qeyd edib.
Onun sözlərinə görə, bu görüşün məqsədi Avropa təhlükəsizliyi və Ukraynanın müharibədən sonrakı gələcəyi ilə bağlı son bir neçə həftə ərzində aparılan sıx məsləhətləşmələri və koordinasiya işlərini davam etdirməkdir.
Xatırladaq ki, Vaşinqtonun vasitəçiliyi ilə Moskva və Kiyev nümayəndələri arasında Əbu-Dabidə planlaşdırılan danışıqlar noyabrın 10-u və 11-də baş tutacaq.
