BAKI, 14 sentyabr. TELEQRAF
Parlament üzvləri lazımi qanun layihələrini vaxtında qəbul etməsələr, Ukrayna beynəlxalq maliyyələşdirmənin 29,5 milyard dollarının əhəmiyyətli bir hissəsini itirmək riski ilə üzləşir.
Teleqraf xəbər verir ki, bu barədə Ukraynanın Baş naziri Sergey Koretskinin Telegram-dakı paylaşımına istinadən məlumat yayıb.
Baş nazir dövlət maliyyəsi ilə bağlı vəziyyətin kritik həddə çatdığını bildirib. O, deputatları beynəlxalq maliyyə yardımının alınmasının asılı olduğu qanun layihələrini tez bir zamanda qəbul etməyə çağırıb.
Parlament üzvləri ilə bir neçə ilkin görüşdən sonra hökumət rəsmi olaraq bütün deputatlara və müvafiq komitələrə hər bir tələb olunan səsvermə üçün konkret son tarixləri göstərən cədvəl göndərəcək.
Əgər bu son tarixlər qaçırılarsa, Ukrayna planlaşdırılan 29,5 milyard dollarlıq beynəlxalq maliyyələşdirmənin əhəmiyyətli bir hissəsini itirmək riski ilə üzləşir.
Koretskinin sözlərinə görə, bu vəsait dövlət büdcəsinin balanslaşdırılması, sosial xərclərin maliyyələşdirilməsi və hər şeydən əvvəl Müdafiə Qüvvələrinin ehtiyaclarının ödənilməsi üçün lazımdır.
Öhdəliklərin ayrıca bir hissəsi Nazirlər Kabinetinin üzərinə düşür. Hökumət beynəlxalq maliyyə dəstəyini təmin etmək üçün zəruri olan 42 qərarı həyata keçirməlidir.
Əvvəllər Nazirlər Kabineti bu işi 1 noyabr tarixinə qədər başa çatdırmağı planlaşdırırdı. Lakin vəziyyətin mürəkkəbliyi səbəbindən hökumət prosesi sürətləndirmək qərarına gəldi və indi bütün öhdəliklərini 15 oktyabr tarixinə qədər yerinə yetirməyi planlaşdırır.
Baş nazir qeyd edib ki, hökumət öz növbəsində öhdəliklərin tam yerinə yetirilməsinə zəmanət verir.
