BAKI, 15 iyul. TELEQRAF
Moldova və Rumıniya prezidentləri Maya Sandu və Nikusor Dan, eləcə də Xorvatiyanın Baş naziri Andrey Plenkoviç Kiyevə səfər ediblər.
Teleqraf xəbər verir ki, bu barədə Ukraynanın xarici işlər naziri Andrey Sibiqa sosial şəbəkə hesabında yazıb.
“Kiyev Ukrayna Dövlətçiliyi Günündə hörmətli yüksək vəzifəli qonaqları qarşılayır. Avropa Komissiyasının sədri Fon der Leyen və Cənub-Şərqi Avropa liderləri məhsuldar danışıqlar aparmaq üçün Prezident Zelenski ilə görüşəcəklər. Aİ-yə gedən yolda tərəfdaşlığımızı və əməkdaşlığımızı bir daha təsdiqləmək üçün beşinci Ukrayna-Cənub-Şərqi Avropa Zirvə Toplantısını keçirəcəyik”, - deyə o qeyd edib.
Nazirin sözlərinə görə, səfər zamanı tərəflər Avropa təhlükəsizliyinin gücləndirilməsinə, çoxtərəfli siyasi qarşılıqlı əlaqələrin və müdafiə sektorunda əməkdaşlığın inkişafına diqqət yetirəcək, eləcə də digər müvafiq məsələləri müzakirə edəcəklər.
Sibiqa əlavə edib ki, Kiyevdə keçirilən beşinci Ukrayna-Cənub-Şərqi Avropa sammiti əvvəllər Afina, Tiran, Dubrovnik və Odessada keçirilən bu formatdakı bir sıra görüşlərin davamıdır.
