BAKI, 3 aprel. TELEQRAF
ABŞ Prezidenti Donald Trampın Ermənistana tətbiq etdiyi 10 faizlik gömrük rüsumu erməni mallarına tələbatı azaldacaq.
Teleqraf xəbər verir ki, bunu erməni politoloq Suren Sərkisyan deyib.
“Tramp Ermənistana da 10 faizlik rüsum tətbiq edib. Ermənistan Trampın ticarət müharibəsindən kənarda qalmayıb. Demək olar ki, bütün ölkələr yeni gömrük rüsumları siyahısına daxil edilib. Ancaq Rusiya kimi bəzi istisnalar var. Tramp aprelin 5-dən ABŞ-yə bütün idxal mallarına 10 faizlik universal tarifin qüvvəyə minəcəyini açıqlayıb.
Tramp qarşılıqlı tariflər tətbiq edib, bu mexanizm vasitəsilə Vaşinqton Amerika malları üçün bazarlarını məhdudlaşdıran ölkələrə təxminən eyni səviyyədə tariflər tətbiq edir. Bu, ABŞ bazarındakı azsaylı Ermənistan mallarının qiymətinin artması deməkdir ki, bu da onların rəqabət qabiliyyətinə təsir edəcək. Bəzi əsas sektorlar, xüsusən də alüminium, qiymətli daşlar və metallar, kənd təsərrüfatı məhsulları və spirt tələbatın azalmasından təsirlənə bilər”, - ekspert bildirib.
Sərkisyan Ermənistan-ABŞ ticarət dövriyyəsindəki azalmaya da diqqət çəkib:
“2024-cü ildə Ermənistanla ABŞ arasında ticarət dövriyyəsinin ümumi həcmi 282,4 milyon dollar qiymətləndirilib.
ABŞ-nin Ermənistana mal ixracı 160,8 milyon dollardır ki, bu da 2023-cü illə müqayisədə 14,8 faiz (27,9 milyon dollar) azdır.
ABŞ-nin Ermənistandan mal idxalı 2023-cü illə müqayisədə 8,4% (11,1 milyon dollar) azalaraq 121,6 milyon dollar olub.
ABŞ-nin Ermənistanla ticarət dövriyyəsinin müsbət saldosu 39,2 milyon dollardır ki, bu da 2023-cü illə müqayisədə 29,9 faiz (16,7 milyon dollar) azalıb”.
