BAKI, 5 noyabr. TELEQRAF

ABŞ Konqresinin Nümayəndələr Palatasında demokratların lideri Hakim Ceffris spiker vəzifəsinə namizədliyini irəli sürüb.

Teleqraf xəbər verir ki, bu barədə siyasətçi noyabrın 4-də rəsmi saytında dərc etdiyi bəyanatda bildirib.

Ceffris Demokratlar Partiyasından olan həmkarlarını onun namizədliyini dəstəkləməyə çağırıb.

“Mən sizdən Nümayəndələr Palatasının növbəti spikeri vəzifəsinə namizədliyimi dəstəkləməyinizi xahiş edirəm”, – deyə o vurğulayıb.

Siyasətçi ABŞ Prezidenti Donald Tramp administrasiyasının Konqres üzərində əvvəlki təsir imkanlarının sona çatdığını iddia edib.

“Nümayəndələr Palatasının tamamilə Tramp administrasiyasına tabe olduğu dövr geridə qalıb”, – Ceffris bildirib.

O, yeni Konqresin icra hakimiyyətinin fəaliyyətinə daha ciddi nəzarət edəcəyini vurğulayıb.

Qeyd edək ki, noyabrın 3-də ABŞ-də keçirilən aralıq seçkilərdən sonra demokratların Konqresin hər iki palatasında çoxluq əldə edəcəyi bildirilir.

Yeni tərkibdə Konqres 2027-ci il yanvarın 3-də fəaliyyətə başlayacaq.

Ceffris spiker seçilərsə, ABŞ tarixində Nümayəndələr Palatasına rəhbərlik edən ilk afroamerikalı olacaq.