BAKI, 9 yanvar. TELEQRAF

ABŞ rəsmiləri qrenlandiyalıları Danimarkadan ayrılmağa və Amerika ilə birləşməyə inandırmaq üçün onlara birdəfəlik pul ödəmək imkanını müzakirə ediblər.

Teleqraf xəbər verir ki, bu barədə dörd mənbəyə istinadla “Reuters” məlumat yayıb.

İki mənbənin bildirdiyinə görə, ödənişlərin dəqiq məbləği və logistikası hələlik məlum olmasa da, adambaşına 10 min dollardan 100 min dollara qədər məbləğ müzakirə ediblər. Danimarkanın xarici ərazisi olan Qrenlandiyanın sakinlərinə birbaşa pul ödənilməsi ideyası Kopenhagen və Nuukun “Qrenlandiya satılmır” mövqeyinə baxmayaraq, ABŞ-nin 57 min əhalisi olan adanı necə almağa cəhd edə biləcəyinə dair ehtimallardan biridir.

Həmçinin mənbələrdən biri deyib ki, Ağ Evin köməkçiləri Venesuela Prezidenti Nikolas Maduro ilə bağlı əməliyyatdan yaranan impulsu ABŞ Prezidenti Donald Trampın digər, daha qədim geosiyasi hədəflərinə nail olmaq üçün istifadə etməyi planlaşdırırlar.

Bundan əlavə, mənbələrdən biri qeyd edib ki, birdəfəlik ödənişlərlə bağlı daxili müzakirələr yeni deyil, amma son günlərdə daha ciddi xarakter alıb. Xüsusilə adambaşına 100 min dollar ödəniş variantı nəzərdən keçirilir ki, bu da Qrenlandiyanın ümumilikdə təxminən 6 milyard dollara alınması demək olardı.

“Reuters” əlavə edib ki, potensial ödənişlərlə bağlı bir çox detal hələ də qeyri-müəyyəndir. Məsələn, Tramp administrasiyası bu yolu seçərsə, vəsaitin nə vaxt və necə paylanacağı, yaxud bunun əvəzində qrenlandiyalılardan konkret olaraq nə gözlənildiyi. Ağ Ev bildirib ki, hərbi müdaxilə də mümkün variantdır, amma agentliyə danışan rəsmilərin sözlərinə görə, ABŞ adanı almağa və ya diplomatik yollarla başqa cür əldə etməyə üstünlük verir.