BAKI, 5 yanvar. TELEQRAF

ABŞ-nin Venesuelada keçirdiyi hərbi əməliyyatdan sonra Prezident Donald Tramp yenidən Qrenlandiyanın ələ keçirilməsinə çağırıb, Kolumbiya və Kubaya qarşı hərbi hədələrə başlayıb.

Teleqraf xəbər verir ki, bu barədə “Associated Press” (AP) yazıb.

ABŞ lideri və dövlət katibi Marko Rubionun bu bəyanatları Vaşinqtonun Qərb yarımkürəsində daha fəal rol oynamaqda ciddi olduğunu göstərir.

ABŞ-nin yenilənmiş Milli Təhlükəsizlik Strategiyasında Tramp Ağ Evdəki ikinci müddəti üçün əsas istiqamət kimi “Qərb yarımkürəsində Amerika hegemoniyasının bərpası”nı müəyyən edib.

Bundan əlavə, Tramp Avropa kolonializmini rədd edən “Monro doktrinası” və ABŞ-nin Panamanın Kolumbiyadan ayrılmasını dəstəkləyərkən istinad etdiyi “Ruzvelt düzəlişi”nə diqqət çəkib. Məhz bu, ABŞ-yə Panama kanalına nəzarəti təmin etməyə kömək etmişdi.

ABŞ-nin Venesuela əməliyyatı Danimarkada Qrenlandiya ilə bağlı narahatlığı artırıb. Danimarka Baş naziri Mette Frederiksen bəyan edib ki, Trampın bu adanı ilhaq etmək hüququ yoxdur və ABŞ-ni tarixi baxımdan yaxın müttəfiqə qarşı hədələri dayandırmağa çağırıb.

Tramp isə Danimarkanın Qrenlandiyada milli təhlükəsizliyi gücləndirmək səylərini məsxərəyə qoyub. Tramp administrasiyasının keçmiş rəsmisi Keti Millerin sosial mediada Qrenlandiyanın ABŞ bayrağının rənglərində göstərildiyi və üzərində “TEZLİKLƏ” ifadəsi olan xəritə paylaşımı həm danimarkalılar, həm də qrenlandiyalıların narazılığına səbəb olub.

Venesuelanın ən yaxın müttəfiqlərindən biri olan Kubada da narahatlıq artır. Marko Rubio Kuba hökumətinə xəbərdarlıqla çıxış edib. Onun sözlərinə görə, Venesuela Prezidenti Nikolas Maduro kubalılar tərəfindən qorunub və Venesuela kəşfiyyatına da məhz kubalılar cavabdeh olub.

Tramp isə bildirib ki, illərdir ABŞ sanksiyalarından əziyyət çəkən Kuba iqtisadiyyatı acınacaqlı vəziyyətdədir və subsidiyalı neftlə adanı təmin edən Maduronun hakimiyyətdən getməsi ilə bu vəziyyət daha da pisləşəcək.

Tramp Venesueladakı əməliyyatdan sonra Kolumbiyanı da xatırladıb. O bəyan edib ki, bu ölkəni kokaín istehsal etməyi və onu ABŞ-yə satmağı sevən xəstə adam (Prezident Qustavo Petro) idarə edir.

Jurnalistlərin ABŞ-nin Kolumbiyada əməliyyat keçirib-keçirməyəcəyi ilə bağlı sualına Donald Tramp belə cavab verib:

“Bu, mənə xoş gəlir”.