BAKI, 29 sentyabr. TELEQRAF

İstanbul Beynəlxalq Hava Limanında üzərinə həbs qoyulmuş İranın “Caspian Airlines” aviaşirkətinə məxsus təyyarə sentyabrın 29-da Tehrana qayıdacaq.

Teleqraf xəbər verir ki, bu barədə aviaşirkətin mətbuat xidməti məlumat yayıb.

“Caspian Airlines aviaşirkəti dərhal məsələni araşdırmağa və razılaşdırmalara başlayıb, aidiyyəti xidmətlərin iştirakı ilə zəruri hüquqi və inzibati tədbirlər görülüb. Türkiyədə saxlanılan “Caspian” təyyarəsi bu gün ölkəyə qayıdacaq”, - açıqlamada bildirilib.

Dünən Türkiyənin T24 portalı “Caspian Airlines” aviaşirkətinin Türkiyənin “ACM Temsil” şirkətinə olan 3 milyon avro borcu səbəbindən İstanbul Beynəlxalq Hava Limanında aviaşirkətə məxsus təyyarənin üzərinə həbs qoyulduğu haqda məlumat yaymışdı.