BAKI, 3 aprel. TELEQRAF

Şimali Kipr Türk Cümhuriyyəti Məclisinin sabiq sədri, millət vəkili Zorlu Töre "Teleqraf" İnformasiya Agentliyinin suallarını cavablandırıb.

Onunla müsahibəni təqdim edirik:

- Zorlu bəy, hazırda Azərbaycanla Şimali Kipr Türk Cümhuriyyəti arasında siyasi əlaqələri necə qiymətləndirirsiniz?

- Əlaqələrimiz inkişaf etməkdədir. İki ölkə arasında siyasi əlaqələrin daha da inkişaf etməsini arzulayırıq. Təbii ki, Türkiyədən sonra bizi ən yaxın tanıyan ölkə Azərbaycandır. Şimali Kipr Türk Cümhuriyyəti Məclisi ilə Azərbaycan Respublikası Milli Məclisinin Parlamentlərarası Dostluq qrupu, rəsmi nümayəndələr və qurumlar arasında qarşılıqlı səfərlər həyata keçirilir.

Azərbaycanla Şimali Kipr Türk Cümhuriyyəti arasında münasibətlərin hətta rəsmi tanınma səviyyəsinə çatmasını istəyirik. Əgər bu tanınma baş versə, Kipr rumlarının da ümidi kəsilər, hazırkı iddialarından əl çəkər və Şimali Kipr Türk Cümhuriyyəti ilə vahid dövlət qurma ehtimallarının aradan qalxacağını düşünərlər.

Rumlar və yunanlar hələ də Kipri yunan torpağı hesab edir, bu mövqelərindən geri durmurlar. Mövcud şərtlər altında isə federasiya yaratmaq mümkün deyil, Şimali Kipr Türk Cümhuriyyəti öz yolunda irəliləməyə davam edir.

- Şimali Kipr Türk Cümhuriyyəti ilə Parlamentlərarası Dostluq qrupunun fəaliyyətini necə dəyərləndirirsiniz?

- Parlamentlərarası Dostluq qrupunun fəaliyyəti iki xalq arasında yeni üfüqlər açacaq. Yaxın günlərdə ŞKTC Parlamentlərarası Dostluq qrupunun sədri Cavanşir Feyziyev və Türkiyənin dostluq qrupu ölkəmizə səfər etmişdi. Üç parlamentin dostluq qruplarının fəaliyyəti siyasi əlaqələrimizi daha da inkişaf etdirəcək. Dostluq qrupunun fəaliyyəti çox önəmlidir, amma iki ölkə arasında əlaqələrin daha yüksək səviyyədə irəliləməsini istəyirik.

- Sizin Şimali Kipr Türk Cümhuriyyəti Məclisinin sədri kimi ölkəmizə səfəriniz və Milli Məclisin sədri Sahibə Qafarova ilə görüşünüz baş tutmuşdu...

- Bəli, mən eyni zamanda hörmətli Sahibə xanımı Şimali Kipr Türk Cümhuriyyətinə dəvət etmişdim. Bu səfər baş tutsa, çox məmnun olarıq.

Mənim səfərim çərçivəsində Prezident İlham Əliyev və Baş nazir Əli Əsədov ilə görüşmüşdük. Cənab Prezident İlham Əliyevin Şimali Kipr Türk Cümhuriyyəti haqqında fikirləri bizə böyük stimul verdi.

- Hazırda iki ölkə arasında əlaqələrin daha da möhkəmlənməsi üçün nə kimi işlər görülür?

- Qarşılıqlı şəkildə rəsmi nümayəndələrimizin səfərləri təşkil edilir. Siyasi əlaqələrimizlə yanaşı, digər sahələrdə də əməkdaşlığı genişləndirmək lazımdır. Şimali Kipr Türk Cümhuriyyəti türk dünyasından daha artıq dəstəyə ümid edir. Hazırda bu dəstəyi daha çox Türkiyədən hiss edirik. Azərbaycanla da oxşar münasibətlərin qurulacağına ümidliyik. Azərbaycanın Şimali Kiprə dəstəyi böyük əhəmiyyət kəsb edir.

Ölkəmizin Türk Dövlətləri Təşkilatında müşahidəçi statusunun əldə olunması mühüm bir addımdır, lakin bu, tam tanınmanı əvəz eləmir. Şimali Kipr beynəlxalq təzyiqlərlə üzləşir, bunun aradan qaldırılmasına çalışırıq. Azərbaycan və Pakistan kimi qardaş ölkələrin dəstəyi ilə bu təzyiqlərin azaldılması mümkündür.

- Şimali Kipr Türk Cümhuriyyətində azərbaycanlı iş adamları üçün hansı şərait yaradıla bilər?

- İqtisadi əlaqələr baxımından, Azərbaycan iş adamlarının Şimali Kiprə marağı artırıla bilər. Turizm, sənaye və digər sahələrdə sərmayə qoyuluşu potensialı mövcuddur. Azərbaycanlı tələbələr üçün təhsil imkanlarının genişləndirilməsi, qarşılıqlı təhsil mübadilələrinin gücləndirilməsi vacibdir. Qarşılıqlı şəkildə burslar verilə bilər. Bu sahədə iki ölkənin təhsil nazirliklərinin əməkdaşlıq etməsi və universitetlər arasında daha sıx əlaqələrin qurulması yaxşı addım olar.

İş adamları, qarşılıqlı olaraq görüş təşkil etməli və yatırımlarını müəyyənləşdirməlidirlər. Türkiyə, Azərbaycan və Şimali Kipr Türk Cümhuriyyəti arasında enerji sahəsində Aralıq dənizi sahəsində layihələrin gerçəkləşdirməsi mümkündür.