BAKI, 4 aprel. TELEQRAF

“Gürcüstana göndərilmiş dərsliklərin məzmunu ilə bağlı həmin dövlət tərəfindən bizə rəsmi müraciət daxil olduğu təqdirdə, məsələ müzakirə oluna bilər”.

Bu barədə Teleqraf-ın sorğusuna cavab olaraq Elm və Təhsil Nazirliyindən bildirilib.

Gürcüstanın azərbaycandilli məktəbləri üçün göndərilən dərsliklərdə yaranmış problemi şərh edən qurumdan qeyd olunub ki, ümumi təhsil pilləsi üçün dərsliklər Nazirlər Kabinetinin 2020-ci il 25 fevral tarixli 67 nömrəli qərarı ilə təsdiq edilmiş “Ümumi təhsil müəssisələri üçün dərsliklərin, dərs vəsaitlərinin və digər tədris-metodik vasitələrin hazırlanması Qaydası”ndakı meyarlara əsasən təhsilalanların yaş səviyəsinə uyğun hazırlanır.

“Həmin dərsliklər hazırlandıqdan sonra qaydadakı meyarlar əsasında və dil-üslub baxımından mütəxəssislər tərəfindən qiymətləndirilir, aidiyyəti üzrə təsdiq olunur, istifadə üçün yerlərə, eləcə də Gürcüstanın tədris Azərbaycan dilində olan ümumtəhsil müəssisələrinə təqdim olunur”, - Elm və Təhsil Nazirliyinin sorğuya cavabında vurğulanıb.

Azərbaycandan göndərilən kitabların Gürcüstandakı azərbaycandilli məktəbləri tam əhatə edib-etməməsinə gəlincə, nazirlikdən bildirilib ki, hər bir tədris ili üçün Gürcüstanın tədris Azərbaycan dilində olan ümumtəhsil müəssisələrinin dərslik ehtiyacının müəyyənləşdirilməsi ilə bağlı Gürcüstanın Təhsil, Elm və Gənclər Nazirliyi ilə rəsmi yazışmalar aparılır və həmin müəssisələrin ehtiyacı olan bütün dərsliklərlə təminat həyata keçirilir:

“Hər tədris ilində Gürcüstana orta hesabla 20 min nüsxədən çox dərslik göndərilir”.

Xatırladaq ki, Gürcüstan ombudsmanı Levan İoselianinin 2024-cü il üzrə İnsan hüquqları və azadlıqlarının vəziyyətinə dair hesabatında yazılıb ki, Gürcüstanın azərbaycandilli məktəbləri üçün Azərbaycanın təqdim etdiyi dərsliklər yeni olsalar da, fənn müəllimləri tədris zamanı problemlərlə üzləşirlər. Qeyd olunub ki, birinci sinif üçün Azərbaycan dili dərsliyi əlifbadan başlamır, belə ki, Gürcüstandan fərqli olaraq Azərbaycanda I sinfə qəbul olunanlar öncə hazırlıq dövrünü keçir.