Bakı, 3 aprel. TELEQRAF

"Çin-Azərbaycan münasibətlərini xarakterizə edərkən bir neçə əsas istiqaməti vurğulamaq lazımdır. İlk növbədə, dövlətlərarası münasibətlərin siyasi fundamenti möhkəmdir. Hər iki ölkə beynəlxalq hüququn prinsiplərinə əsaslanan əlaqələr qurub. Azərbaycan, eyni zamanda, “vahid Çin” siyasətini dəstəkləyir. Bu, rəsmi Pekin üçün mühüm əhəmiyyət daşıyır".

Bunu Teleqraf-a açıqlamasında Milli Məclisin deputatı Rizvan Nəbiyev deyib.

Deputat bildirib ki, Azərbaycanın Tayvanı Çinin ərazisi kimi tanıması rəsmi Pekin tərəfindən yüksək qiymətləndirilir:

"İkitərəfli münasibətlərin tarixinə nəzər salsaq, 1994-cü ildə Ulu Öndər Heydər Əliyevin Çinə səfəri mühüm mərhələ olub. Bu münasibətlər sonrakı dövrdə genişlənib və 2024-cü ildə strateji tərəfdaşlıq səviyyəsinə yüksəlib. Dövlətlərarası münasibətlərin digər vacib elementi Azərbaycanın beynəlxalq təşkilatlarda Çinlə əməkdaşlığa verdiyi dəyərdir. Ölkəmiz Ümumdünya Ticarət Təşkilatına üzv olmaq məsələsində Çin təcrübəsindən faydalanmaqda maraqlıdır. BRICS-ə qoşulmaq istiqamətində də Çinlə dialoq aparılır. Bundan əlavə, iki ölkənin dövlət başçıları arasında səmimi münasibətlərin olması əməkdaşlığa müsbət təsir göstərir. Həmçinin Azərbaycanın mühüm geostrateji mövqeyi Çinlə əlaqələrdə əhəmiyyətli rol oynayır. ABŞ-nin Çinə qarşı yeni ticarət tarifləri tətbiq etməsi nəticəsində, Çin-Avropa münasibətlərində ticarət dövriyyəsinin intensivləşməsi gözlənilir. Hazırda Avropa İttifaqı ilə Çin arasındakı ticarət dövriyyəsi 760 milyard ABŞ dolları həcmindədir və bu kontekstdə Azərbaycanın tranzit imkanları daha da ön plana çıxır".

O vurğulayıb ki, bu inkişaf fonunda Çinlə Azərbaycan arasında ticarət və investisiya sahəsində yeni imkanlar yaranır:

"Prezident İlham Əliyev müsahibələrindən birində qeyd edib ki, Azərbaycanın yaratdığı yeni geosiyasi vəziyyət təkcə Cənubi Qafqaz, Mərkəzi Asiya və Xəzər hövzəsi ilə məhdudlaşmır, bu, hüdudları aşan geniş coğrafiyada sabitliyə töhfə verir. Bu da əsasən Azərbaycanın həyata keçirdiyi infrastruktur layihələri ilə bağlıdır. Yaşıl enerji sahəsində əməkdaşlıq da diqqət çəkir. Dünya iqtisadiyyatı yaşıl enerjiyə keçid mərhələsindədir və bu proses növbəti 30 ildə aparıcı dövlətlərin əsas gündəm məsələlərindən biri olacaq. İşğaldan azad edilmiş ərazilərin yaşıl enerji potensialı 35 QVt səviyyəsində dəyərləndirilir. Bu sahədə bir neçə xarici şirkətlə əməkdaşlıq planlaşdırılır və bu texnologiyaların əhəmiyyətli hissəsinin Çindən gələcəyi gözlənilir. Prezident İlham Əliyevin Çinə gözlənilən səfəri strateji əhəmiyyət kəsb edir. İki ölkə arasında etibarlı dialoq mövcuddur və bu səfər iqtisadi münasibətlərdə yeni hədəflərin müəyyənləşdirilməsinə xidmət edəcək".

Xatırladaq ki, Prezident İlham Əliyev apreldə Çinə səfər edəcək. Səfər çərçivəsində konkret layihələrlə bağlı qərarlar qəbul olunacaq.