BAKI, 5 aprel. TELEQRAF
Ermənistan Xarici işlər Nazirliyi Qarabağ ermənilərinin hüquqları ilə bağlı məsələnin gündəlikdən çıxarıldığını bildirib.
Teleqraf xəbər verir ki, Ermənistan XİN-indən "Azatutyun" nəşrinin sualının cavabında belə deyiblər.
Açıqlamadan bildirilir: "Dağlıq Qarabağ ermənilərinin məcburi deportasiyası və Dağlıq Qarabağın ləğvi haqqında fərmanın dərcindən sonra bu məsələ Ermənistan və Azərbaycan arasında dövlətlərarası münasibətlərin normallaşdırılması gündəliyindən çıxarılıb".
Azərbaycan Prezidenti İlham Əliyev Almaniya prezidenti ilə birgə keçirdiyi mətbuat konfransında bildirib ki, danışıqlarda əsas maneə 2024-cü ilin yanvarına qədər “Ermənistanın israrla qondarma Dağlıq Qarabağ Respublikasının taleyini sülh müqaviləsinə daxil etməyə çalışırdı”.
Ermənsitan XİN-i bu məqamla bağlı sualı da cavablandırıb: “Biz əvvəllər dəfələrlə bəyan etmişik ki, Azərbaycanla danışıqlarda Ermənistan Dağlıq Qarabağ ermənilərinin təhlükəsizliyinin və hüquqlarının təmin edilməsinə, o cümlədən bu məsələlərin həlli üçün beynəlxalq mexanizmin yaradılmasına çalışıb. Üçüncü ölkədə Azərbaycan və Dağlıq Qarabağ nümayəndələri arasında görüş təşkil etməklə bağlı səylərində də məqsəd bu idi. Amma Dağlıq Qarabağ bu görüşlərdən imtina etdi. Qarabağ ermənilərinin məcburi deportasiyası və Dağlıq Qarabağın ləğvi haqqında fərman dərc edildikdən sonra bu məsələ Ermənistan Respublikası ilə Azərbaycan Respublikası arasında dövlətlərarası münasibətlərin tənzimlənməsinin gündəliyindən çıxarılıb”.
