BAKI, 3 aprel. TELEQRAF

"Ermənistan müharibəyə başlasa, real əraziləri - 9 min kvadrat kilometrlə barışmalı olacaq".

Bunu Teleqraf-a açıqlamasında Milli Məclisin Müdafiə, təhlükəsizlik və korrupsiya ilə mübarizə komitəsinin üzvü, deputat Hikmət Babaoğlu deyib.

Ermənistanın təxribatlarının arxasında xüsusi məqsədlərin dayandığını deyən deputat qeyd edib:

"Erməni tərəfini 5 il müddətində müharibəyə hazırlayan Fransa-Hindistan tandemi hesab edir ki, artıq sözügedən ölkənin gücünün nümayiş etdirilməsinin vaxtı çatıb. Şühbəsizdir ki, Azərbaycan qarşı tərəfə ən sərt şəkildə cavab verməyə hazırdır. Ermənilər dildə nə qədər sülhdən danışsalar da, əməldə fərqli hadisələrin olduğunu görürük. Özünü vassal halına salmış ölkə elə vəziyyətdədir ki, bir bataqlıqdan çıxamamış digərinə düşüb. Dünənə qədər başqa dövlətin təhriki ilə bizə qarşı müharibəyə hazırlaşan ölkənin havadarları dəyişib. İndi Fransa və Hindistan erməniləri müharibəyə hazırlayır. Ancaq rəsmi İrəvan başa düşməlidir ki, Azərbaycanın suverenliyi və təhlükəsizliyinə qarşı atılacaq addım, başqa sözlə, Ermənistan müharibəyə başlasa, real əraziləri - 9 min kvadrat kilometrlə barışmalı olacaq".

Milli Məclisin deputatı Aydın Mirzəzadə isə bildirib ki, Ermənistanın təxribatlarının arxasında Azərbaycanı tələsik sülhə imza atdırmaq istəkləri dayanır.

"Onlar hesab edirlər ki, rəsmi Bakı şərait yetişmədiyi halda sülhə imza atacaq. Belə olacağı halda, Azərbaycanın gələcək taleyində ciddi problemlər yarana bilər. Azərbaycan Prezidenti İlham Əliyev dünən alman həmkarı ilə keçirdiyi mətbuat konfransında bəyan etdi ki, Ermənistan konstitusiyasında dəyişiklik etməyənə, həmçinin ATƏT-in Minsk Qrupunun ləğvinə dair birgə bəyanat verməyə razı olmayana qədər rəsmi Bakı sülh müqaviləsini imzalamayacaq. Qarşı tərəf 2020-ci ildəki Vətən müharibəsinin nəticələrindən dərs çıxarmalıdır. Ancaq görünən odur ki, hələ də köhnə təfəkkürdədirlər. Sülh olmayacağı halda, ermənilər Azərbaycan və Türkiyənin imkanlarından məhrum olacaq. Nə qədər tez nəticə çıxarsalar, qonşu dövlət gələcək taleyini bir o qədər tez müəyyənləşdirmiş olar. Azərbaycan səbrlə dözəcək, cavab verməyəcək deyə düşünən Ermənistan səhv etdiyinin fərqinə hələ də varmır", - deyə A.Mirzəzadə söyləyib.