BAKI, 5 aprel. TELEQRAF

Rejissor Elvin Rüstəmzadənin "Ayıq sürücü” qısametrajlı filmi Buzovna sakinləri tərəfindən etirazlara səbəb olub.

Filmin ssenaristi Əli Ucal Teleqraf-a açıqlamasında Buzovna sakinləri tərəfindən təhdid edildiyini açıqlayıb.

""Ayıq sürücü" filmini təqdim etdikdən sonra çox müsbət reaksiyalar aldıq. Heç kimdən aqressiya görmədik. Təqdimatdan üç-dörd gün sonra aktyor Mirzə Ağabəylinin oğlu mənə sosial şəbəkədə yazdı və bildirdi ki, film əladır, amma filmdən Buzovnanın adı çıxarılmalıdır. Mən onu başa saldım ki, film artıq yayımlanıb və bu mümkün deyil. Buzovnanın adı filmdə şərti olaraq qeyd edilir. O isə mənə cavab verdi ki, Buzovnanın adını çıxarmırsınızsa, təhqirlərə hazır olun! Sonra bizim ünvanımıza təhqirlər, soyüşlər yazmağa başladılar. Bizim filmdə Buzovnanın adını qeyd etməkdə məqsədimiz kimisə təhqir etmək deyil. Biz bu gün təhdid olunuruq. Mənə yazırlar ki, "Sizi tutacağıq", "Haradasa əlimizə keçəcəksiniz" və sair. Filmin rejissoru Elvin Rüstəmzadəyə və mənə qarşı böyük təhdidlər var. Filmin ssenari müəllifi olmaqla yanaşı, baş rolu da mən canlandırıram. Ən çox söyülən, təhqir edilən mənəm", - deyə Ə.Ucal deyib.

Ssenarist vurğulayıb ki, Buzovna sakinləri hüquq-mühafizə orqanlarına müraciət ediblər: "Polis bizimlə əlaqə saxlayıb ki, sizin haqqınızda şikayət var, izahat yazmalısınız. Buzovna camaatı isə 500 imza toplamaqla bizi məhkəməyə vermək istəyirlər. İnsanlar bizdən əl çəkmirlər. Film 200 min dəfədən çox izlənilib. Xalalar da mənə yazır ki, məsələyə aydınlıq gətirin... Bəzi insanlar məni başa düşdülər, amma bir çoxları isə məsciddə bizə lənət oxuyurlar. Mənə 2025-ci ildə belə hadisələr həm gülməli, həm kədərli gəlir. İnsanlar filmdə adıçəkilən küçəyə gedib soruşublar ki, burada elə bir qadın yaşayırımı? Deyiblər ki, xeyr. Ondan sonra düşünüblər ki, biz Buzovna sakinlərinə şər atırıq. Filmdəki hadisələr real deyil, təxəyyül məhsuludur. Həmin qadın isə Buzovnadan deyil, gəlmədir. Filmdə Buzovnanın adını qeyd etməklə bağlı problem yaşayacağımızı gözləmirdik. Bilsəydik ki, belə olacaq, Buzovnanın adını qeyd etməzdik. Mənə bir-birinə uzaq iki qəsəbə lazım idi, ona görə də Buzovna və Mehdiabadı seçdim. Buzovnadakı küçəyə gəlincə, onu xəritədən tapdım. Heç vaxt Buzovnada olmamışam. Filmdəki hadisələrin real təsir bağışlaması üçün o küçəni seçdim. Şərti ad qoysaydım, real görünməyəcəkdi.

Biz heç kimdən hüquq-mühafizə orqanlarına şikayət etmək istəmirik. İstəyirəm ki, artıq bu məsələlər bitsin. Filmə film kimi yanaşsınlar. Orada Buzovna sakinləri qətiyyən təhqir edilməyib".

Qeyd edək ki, "Ayıq sürücü" filmində "Xala Buzovnada qalır” ifadəsi Buzovna sakinləri tərəfindən təhqir kimi qiymətləndirilib.