BAKI, 3 aprel. TELEQRAF

“Şamaxı”nın ukraynalı müdafiəçisi Vladislav Veremeyev və almaniyalı hücumçusu Leroy Mikels “Neftçi”yə qarşı Azərbaycan Premyer Liqasının XXIX tur matçını buraxmalı olacaq.

Bu barədə Teleqraf-a əyalət təmsilçisinin mətbuat xidmətinin rəhbəri Yusif Hüseynov məlumat verib.

Klub rəsmisi ötən tur səfərdə “Zirə”yə 0:3 hesabı ilə uduzduqları oyunda zədələnən legionerlərin hazırda məşqlərdə iştirak etmədiklərini bildirib: “Mikelsdə köhnə zədədir. Hücumçu eyni yerdən, yəni ayağından zərbə alıb. Ona görə bir həftə fizioterapiya keçəcək, sonra məşqlərə başlaya bilər. Vermeyevdə də əzələ dartılmasıdır. Müdafiəçimiz də bir neçə gün fizioterapiya keçməlidir. Daha sonra məşqlərə başlaya biləcək”.

Xatırladaq ki, “Şamaxı” "Neftçi"ni aprelin 7-də qəbul edəcək. Şamaxı şəhər stadionunda keçiriləcək matç saat 15:30-da start götürəcək.