BAKI, 11 oktyabr. TELEQRAF
“İsayias” qasırğasının ABŞ-nin Florida və Alabama ştatlarında törətdiyi fəsadlar nəticəsində azı 4 nəfər həyatını itirib.
Teleqraf xəbər verir ki, CNN yerli hakimiyyət orqanlarına istinadən məlumat yayıb.
Florida ştatının Eskambiya dairəsində 2 nəfər, Alabama ştatında isə daha 2 nəfər ölüb.
“İsayias” qasırğası oktyabrın 9-da axşam saatlarında Florida sahillərindən Meksika körfəzinə daxil olub. Təbii fəlakət güclü külək və leysan yağışlarına səbəb olub. Qasırğa Dastin şəhəri yaxınlığında ikinci kateqoriyaya uyğun güclə quruya çıxıb və küləyin sürəti 175 km/saatadək çatıb.
Daha sonra qasırğa zəifləyərək posttropik siklona çevrilib. ABŞ-nin cənub-şərqində güclü külək və ayrı-ayrı tornado təhlükəsi davam edib. Bölgədə bərpa işlərinə başlanılıb, yüz minlərlə istehlakçı elektrik enerjisiz qalıb.
