BAKI, 4 aprel. TELEQRAF

Birinci sinfə elektron qeydiyyat prosesinə hazırlıq çərçivəsində mikroərazilər üzrə ünvanların dəqiqləşdirilməsi məqsədilə edilən müraciətlərin qəbulu aprelin 1-də yekunlaşıb.

Bunu Teleqraf-ın sorğusuna cavab olaraq Məktəbəqədər və Ümumi Təhsil üzrə Dövlət Agentliyi bildirib.

Bildirilib ki, Bakı Şəhəri üzrə Təhsil İdarəsi və Abşeron-Xızı Regional Təhsil İdarəsi tərəfindən ümumilikdə 2000 nəfərə yaxın vətəndaşın müraciəti qeydə alınıb. Hazırda bu müraciətlər təhlil mərhələsindədir.

Qeyd edək ki, ünvan dəqiqləşdirilməsi prosesi birinci sinfə qəbul zamanı vətəndaşların yaşayış yerlərinə uyğun məktəb seçimini düzgün və şəffaf şəkildə həyata keçirmək məqsədi daşıyır.