BAKI, 9 oktyabr. TELEQRAF
Toskanadakı "Marchesi Antinori" şərabçılıq təsərrüfatında İtaliya tarixində ən böyük şərab oğurluğu baş verib. Ümumi dəyəri təxminən 5 milyon avro olan 30 000 şüşə şərab oğurlanıb.
Teleqraf xəbər verir ki, bu barədə şirkətin icraçı direktoru Renzo Kotarella açıqlama verib:
"İstintaq məlumatlarına görə, bazar günü gecə saatlarında Arezzo əyalətinin Kortona şəhərindəki bir anbara maskalı azı yeddi nəfər daxil olub. Cinayətkarlar siqnalizasiya sistemini və müşahidə kameralarını sıradan çıxarıb, daha sonra şərab zavodunun özünə məxsus yükləyicilərdən istifadə edərək şüşələri iki iri yük maşınına yükləyiblər.
Oğurlanmış məhsullara 2023-cü il məhsulu olan təxminən 10 000 şüşə "Solaia", eləcə də "Tignanello" və "Guado al Tasso" şərabları daxildir. "Solaia"nın illik istehsal həcminin cəmi 60 000–70 000 şüşə olması bu oğurluğu xüsusilə əhəmiyyətli edir. Bu markalara aid şərabların bir şüşəsinin qiyməti 120 ilə 500 avro arasında dəyişir".
