BAKI, 7 avqust. TELEQRAF

Pakistan təhlükəsizlik qüvvələri cənub-qərbdəki Bəlucistan əyalətində 12 terrorçunu məhv edib.

Teleqraf xəbər verir ki, bu barədə İslam Respublikası Silahlı Qüvvələrinin Xidmətlərarası İctimaiyyətlə Əlaqələr İdarəsi məlumat yayıb.

Əvvəllər alınan kəşfiyyat məlumatları əsasında 5 və 6 avqust tarixlərində Vaşuk və Mastunq rayonlarında Fitna əl-Hindustan qrupuna qarşı antiterror əməliyyatları keçirilib.

Qeyd edək ki, Əfqanıstanla həmsərhəd olan Xayber Paxtunxva və Bəlucistan əyalətləri 2025-ci ildə Pakistanda baş verən terror hücumlarının 90%-ni təşkil edib. Hər iki bölgədə müxtəlif silahlı qruplar etnik azlıqların - puştunların və bəlucların hüquqlarını qorumaq bəhanəsi ilə Pakistan təhlükəsizlik qüvvələrinə və mülki əhaliyə hücumlar həyata keçirirlər. İslamabad Əfqanıstan hökumətini yaraqlılara təhlükəsiz sığınacaq verməkdə ittiham edir.