BAKI, 22 iyul. TELEQRAF
Livan Prezidenti Cozef Aun ABŞ Prezidenti Donald Trampla görüşdə İsraillə sərhəddə sabitliyin möhkəmləndirilməsinə dair hərtərəfli plan təqdim edib.
Teleqraf xəbər verir ki, bu barədə Livanın informasiya naziri Pol Morkos jurnalistlərə açıqlamasında bildirib.
Onun sözlərinə görə, plan dövlət hakimiyyətinin ölkənin bütün ərazisində gücləndirilməsini və sərhəd bölgəsindəki vəziyyətə reaksiya mexanizminin yenidən nəzərdən keçirilməsini nəzərdə tutur.
Cozef Aun Donald Trampdan İsrailə təzyiq göstərilməsini və qoşunların işğal olunmuş ərazilərdən mərhələli şəkildə çıxarılmasına razılıq verməsinin təmin edilməsini istəyib. Livan lideri bu addımın siyasi prosesin uğuru üçün mühüm əhəmiyyət daşıdığını vurğulayıb.
Pol Morkos 2009-cu ildən bəri ilk Livan-ABŞ sammitini tarixi görüş adlandırıb. O bildirib ki, Tramp Livan ordusunun döyüş qabiliyyətinin artırılmasına və ölkədə aparılan islahatlara dəstək vəd edib.
Livan Prezidentinin administrasiyasının açıqlamasında qeyd olunub ki, Aun son müharibənin ağır nəticələri və hökumətin iqtisadiyyatın bərpası ilə bağlı planları barədə Trampa məlumat verib.
Tərəflər təhlükəsizlik, müdafiə və iqtisadiyyat sahələrində birgə təşəbbüslərin həyata keçirilməsi üçün sıx koordinasiyanı davam etdirmək barədə razılığa gəliblər.
