BAKI, 23 iyun. TELEQRAF
İranın İraqdakı səfiri Məhəmməd Kazım əs-Sadiq Tehranın ABŞ ilə danışıqlar zamanı Livanın "Hizbullah" hərəkatına dəstəkdən imtina etdiyi barədə yayılan məlumatları təkzib edib.
Teleqraf xəbər verir ki, o, "Iraqi News Agency" agentliyinə açıqlamasında bildirib ki, Livan məsələsi İranın ABŞ ilə danışıqlardakı mövqeyinin ayrılmaz hissəsi olub.
Diplomatın sözlərinə görə, Tehran Livan cəbhəsində atəşkəsin əldə olunmasını İran və ümumilikdə Fars körfəzi bölgəsində hərbi əməliyyatların dayandırılması ilə əlaqələndirib.
"İran livanlı qardaşlarını unutmur və onları tək qoymur", - deyə Məhəmməd Kazım əs-Sadiq vurğulayıb.
Səfir həmçinin qeyd edib ki, İran hakimiyyəti İraqda fəaliyyət göstərən şiə silahlı qruplaşmalarını, xüsusilə terrorçu hesab edilən Islamic State qruplaşmasının fəaliyyətinə cavab olaraq yaranmış "müqavimət hərəkatı" kimi qiymətləndirir.
Onun fikrincə, ABŞ qoşunlarının İraqda qalması ölkənin təhlükəsizliyi və sabitliyini regional münaqişələr qarşısında daha həssas vəziyyətə salır.
