BAKI, 10 yanvar. TELEQRAF

ABŞ Prezidenti Donald Tramp ABŞ Xəzinədarlıq Departamentinin hesablarında saxlanılan Venesuela neft satışından əldə edilən gəlirləri məhkəmə iddialarından qoruyan sərəncam imzalayıb.

Teleqraf xəbər verir ki, sərəncam Ağ Evin saytında dərc edilib.

Sərəncamda bildirilir ki, xarici hökumətlərin depozit fondlarının müsadirə edilməsi və ya məhkəməyə verilməsi ehtimalı ABŞ-nin milli təhlükəsizliyi və xarici siyasəti üçün fövqəladə təhdid təşkil edir.

"Xarici hökumət depozit fondlarına qarşı həbs və ya digər məhkəmə tədbirləri Venesuelada iqtisadi və siyasi sabitliyi təmin etmək üçün vacib səylərimizə əhəmiyyətli dərəcədə mane olacaq. İcazə verilən hallar istisna olmaqla, hər hansı bir müsadirə, hökm, əmr, girov, icra, vəsaitlərin həbsi və ya digər hüquqi prosedur qadağandır və etibarsız hesab olunur" - sənəddə qeyd olunur.