BAKI, 3 aprel. TELEQRAF

ABŞ Prezidenti Donald Tramp Ağ Evdə keçirilən toplantıda dünya ölkələri üçün yeni vergi tariflərini açıqlayıb.

Teleqraf xəbər verir ki, ölkəsinə zərər verən ticarət divarlarını aradan qaldıracaqlarını bildirən Tramp ABŞ-nin qızıl dövrünün geri qayıtdığını qeyd edib.

Tramp ABŞ-nin digər ölkələrə qarşılıqlı tariflər tətbiq edəcəyini və minimum tarif dərəcəsinin 10% olacağını açıqlayıb. Bildirilib ki, yeni tariflər aprelin 5-dən qüvvəyə minəcək.

Çinə 34 faiz, Avropa Birliyinə isə 20 faiz tarif tətbiq edilib.

Tramp Vyetnama 46 faiz, Yaponiyaya 24 faiz, Böyük Britaniyaya 10 faiz, Cənubi Koreyaya 25 faiz, Taylanda 36 faiz, İsveçrəyə 31 faiz, Tayvana 32 faiz, Hindistana 26 faiz, Malayziyaya isə 24 faiz tarif elan edib.

Dərc edilən siyahıya görə ən yüksək tarif Lesotoya (50%), Kambocaya (49%), Laosa (48%), Madaqasqara (48%), Vyetnama (46%), Şri-Lankaya (44%) və Myanmara (44%) tətbiq edilir.

Azərbaycan və Türkiyəyə 10 faiz gömrük rüsumu tətbiq edilir.

Meksika və Kanada Ağ Evin açıqladığı uzun tariflər siyahısından kənarda qalıb.

ABŞ prezidenti Tailand, Hindistan, Vyetnam və digər ölkələri ABŞ məhsullarına qarşı ədalətsiz tarif siyasətləri və vergi rejimlərinə görə tənqid edib.

Tramp deyib ki, qarşılıqlı tariflər "ABŞ-də daha ​​güclü rəqabət və istehlakçılar üçün aşağı qiymətlər” yaradacaq.

Tramp çıxışında xaricdən gətirilən avtomobillərə 25 faiz gömrük rüsumu tətbiq edəcəklərini xatırladıb.