BAKI, 14 fevral. TELEQRAF

“Rusiya ilə yeni danışıqlarda Ukrayna və Qərb vahid mövqe ortaya qoymalıdır”.

Teleqraf Ukrayna mətbuatına istinadən xəbər verir ki, bunu Prezident Volodimir Zelenski Münhen Təhlükəsizlik Konfransı çərçivəsində müzakirələr zamanı deyib.

“Biz Putinlə atəşkəs və əsirlərin mübadiləsi barədə danışmışdıq. Amma o, girovları dəyişməkdən imtina etdi. O, yalançıdır”, - Zelenski vurğulayıb.

Ukrayna Prezidentinin sözlərinə görə, Rusiya ilə müharibənin dayandırılması barədə birbaşa danışıqlara başlamazdan əvvəl Kiyev Avropa və ABŞ ilə ortaq mövqeyə gəlməlidir.

“Mən yalnız bir rusiyalı ilə - Putinlə görüşəcəm. Yalnız Tramp, Avropa və mənim ortaq planımız hazır olanda. O zaman mən Putinlə masa arxasına oturacağam və biz müharibəni dayandıracağıq. Mən yalnız bu şərtlə görüşməyə hazıram, başqa kompromisə getməyəcəyəm. Bizə vasitəçi yox, ABŞ-ın bizim tərəfimizdə olması lazımdır”, - Prezident bildirib.

Zelenski vurğulayıb ki, Ukraynadakı müharibə sadəcə iki dövlət arasında münaqişə deyil, bir ölkənin digərinə təcavüzüdür.