BAKI, 29 may. TELEQRAF

Azərbaycanın ictimai həyatında səmərəli fəaliyyətinə və elmin inkişafında xidmətlərinə görə Asəf Hacı oğlu Hacıyev “Şöhrət” ordeni ilə təltif edilib.

Teleqraf xəbər verir ki, Prezident İlham Əliyev bununla bağlı Sərəncam imzalayıb.

Qeyd edək ki, bu gün Asəf Hacıyevin 75 yaşı tamam olur. O, M.V.Lomonosov adına Moskva Dövlət Universitetinin məzunu, fizika-riyaziyyat elmləri doktoru və professor, həmçinin AMEA-nın həqiqi üzvüdür. Görkəmli alim eyni zamanda Moldova, Monqolustan və Ümumdünya elmlər akademiyalarının üzvü olmaqla beynəlxalq elmi müstəvidə böyük nüfuza malikdir. A.Hacıyev elmi yaradıcılığı ilə yanaşı, uzun illər Bakı Dövlət Universitetində kafedra müdiri kimi pedaqoji fəaliyyət göstərib. O, 1996–2014-cü illərdə Azərbaycan Respublikasının Milli Məclisinin deputatı elm və təhsil məsələləri komitəsinin üzvü olub.