BAKI, 2 sentyabr. TELEQRAF

“Rusiyanın hibrid hücumları müttəfiqlərin birliyini sarsıda və onları Ukraynaya gələcək dəstəkdən imtina etməyə məcbur edə bilməyəcək”.

Teleqraf xəbər verir ki, bunu NATO baş katibi Mark Rutte Brüsseldə Avropa Komissiyasının prezidenti Ursula fon der Leyenlə birgə keçirdiyi mətbuat konfransında deyib.

Leypsiqdə baş verən dron insidentini şərh edən Rutte Rusiyanın getdikcə daha ehtiyatsız davrandığını qeyd edib:

“Şərq cinahımızda tez-tez dron və raketin hava məkanımızı keçdiyini və bunun daha böyük risklər yaratdığını görürük. Həmçinin birbaşa ərazimizə qarşı yönəlmiş zərərli fəaliyyətlərin artmasının da şahidi oluruq - istər Ukrayna üçün müdafiə avadanlığı istehsal edən zavodlarımızda yanğınların törədilməsi, istərsə də Rusiyanın Leypsiqdəki hibrid hücumu olsun. Biz həm alyans çərçivəsində, həm də Avropada Almaniya ilə tam həmrəyik”.

NATO baş katibi Rusiyanın yaratdığı təhlükənin açıq-aydın olduğunu vurğulayıb: “İnsanlarımızın təhlükəsizliyini təmin etməyə hazır olmaq üçün gecə-gündüz çalışırıq”.

Rutte vurğulayıb ki, əgər Rusiya təhdidlərlə müttəfiqləri parçalayacağını və ya onları Ukraynaya dəstəkdən imtina etməyə məcbur edəcəyini düşünürsə, yanılır.

“Bizim birliyimiz sarsılmazdır. Ukraynaya dəstəyimiz aydındır. Müttəfiqlər bu il Ankarada Ukraynaya dəstək üçün ən azı 70 milyard avro, gələn il də eyni məbləğdə vəsait ayırmaq barədə razılığa gəliblər”.