BAKI, 22 oktyabr. TELEQRAF

Şamonda virusundan ilk insan ölümü qeydə alınıb.

Teleqraf xəbər verir ki, bu barədə Fransa Səhiyyə Nazirliyi məlumat yayıb.

Əvvəllər Şamonda virusunun insanlara yoluxmadığı düşünülürdü. Xəstəlik əsasən iribuynuzlu mal-qara arasında yayılır.

“Ciddi xəstəliklə əlaqədar Lion şəhərindəki xəstəxanada müalicə alan, ağır immunçatışmazlığı olan pasiyentə Şamonda virusu yoluxub. O, oktyabrın əvvəlində vəfat edib. Kliniki, bioloji və epidemioloji araşdırmalar davam etdirilir”, - nazirlik bildirib.

Ehtimal olunur ki, pasiyent Fransanın şərqində milçəyin dişləməsi nəticəsində virusa yoluxub.

Şamonda virusu həşəratlar vasitəsilə yayılan ortobunyavirusdur. O, əsasən ev heyvanlarını, xüsusilə də iribuynuzlu mal-qaranı yoluxdurur və heyvanları dişləyən xırda milçəklər vasitəsilə ötürülür. Virus ilk dəfə 1960-cı illərin ortalarında Nigeriyada aşkarlanıb. 2026-cı ilə qədər onun yayılması əsasən Afrikanın bəzi bölgələrində və Yaponiyada qeydə alınıb.