BAKI, 3 aprel. TELEQRAF
Rusiya ordusu Ukraynaya qarşı genişmiqyaslı hücuma hazırlaşır. Mənbələr bunun bir neçə həftə sonra başlayacağını, 6-9 ay davam edəcəyini və 1000 kilometrdən çox cəbhə xəttini əhatə edəcəyini iddia edirlər.
Teleqraf xəbər verir ki, bunu Ukrayna Silahlı Qüvvələrinin ehtiyatda olan general-mayoru Sergey Krivonos deyib.
Onun fikrincə, rusların bütün cəbhə xətti boyunca hücum həyata keçirmək üçün kifayət qədər gücü olmayacaq:
“Əslində eyni vaxtda bütün cəbhə xətti boyunca hücuma keçə bilməyəcəklər, çünki bunun üçün qüvvə və vasitələri çatışmır. Hazırda ruslar əlavə bölmələrin müəyyən ərazilərə köçürülməsindən fəal istifadə edirlər, burada müəyyən atəş üstünlüyü yaradırlar”.
Krivonos bildirib ki, Rusiya ordusu Ukrayna qüvvələrini zəif yerlərindən vuraraq, ərazilərdən sıxışdırıb çıxarır:
“Bəli, müəyyən ərazilərə hücum edə bilərlər, amma bütün cəbhə xətti boyunca mümkün deyil”.
Generalın fikrincə, ruslar aprelin ikinci yarısına yaxın irimiqyaslı hücumun ilk həmlələrini həyata keçirəcəklər: “Çünki mayın 9-da Qırmızı meydanda qələbə paradı (İkinci Dünya müharibəsi ilə əlaqədar - red.) keçirmək üçün ruslara müəyyən uğurlar və əlavə əsir lazım olacaq. Onlar belə şeyləri nümayiş etdirməyi xoşlayırlar”.
