BAKI, 27 dekabr. TELEQRAF
Özbəkistanda azyaşlılarla evliliklərə görə cəzaların sərtləşdirilməsi və dördüncü dərəcəyə qədər qohumlar arasında nikahların qadağan edilməsi təklif olunub.
Teleqraf xəbər verir ki, qadın və uşaqların hüquqlarının qorunması məqsədilə hazırlanmış müvafiq qanun layihəsi ictimai müzakirəyə təqdim edilib.
Sənəd ikinci, üçüncü və dördüncü dərəcəli qohumlar, eləcə də əmi, bibi, xala, dayı və onların uşaqları arasında nikahı qadağan edir. Yalnız evlənənlər arasında faktiki qan qohumluğu olmadığı hallarda istisna nəzərdə tutulur.
Hakimlərin nikah yaşını yalnız hamiləlik və ya uşaq doğulması halında endirmək hüququ da məhdudlaşdırılacaq.
Nikah yaşı çatmamış şəxslə təkrar evlənməyə görə cərimələr 100 faiz (41 milyondan çox sum) artırılacaq. Qanun layihəsində islah işləri müddətinin bir ildən iki ilə qədər artırılması da nəzərdə tutulur ki, bu da ölkədə erkən nikahların qarşısının alınması üçün ediləcək.
Özbəkistanda bu ilin doqquz ayında 15-17 yaşlı qızlarla 155 evlilik halı aşkarlanıb. Ölkədə qohumlar arasında nikah halları da geniş yayılıb.
