Teleqraf.com xəbər verir ki, hakim Əfqan Hacıyevin sədrliyi ilə keçirilən prosesdə prokuror ittiham aktını elan edib.

İttihama görə, İbrahim Sadıqov sevdiyi qızın xalası oğlunu qətlə yetirib. Hadisəyə səbəb isə İbrahim Sadıqovun zarafatı olub.

İbrahim Sadıqov sevdiyi Günel Əsgərovadan "yox" cavabı alıb. Günelin ailəsi də bu evliliyə razı olmayıb. Qız yaşadığı rayondan Bakıya, xalasıgilə gəlib.

İbrahim Sadıqov Günel Əsgərovanın xalasıgilə zəng edərək onunla danışmaq istəyib. Telefona Genel Əsgərovanın xalası oğlu İslam Hüseynov cavab verib.

İbrahim Sadıqov Günellə danışmaq istəsə də xalası oğlu buna icazə verməyib. Bu zaman İbrahim Sadıqov daha əvvəl tanıdığı İslam Hüseynovla zarafat edərək "Güneli anası ilə birlikdə qaçıracağam" deyib.

İbrahim Sadıqovun bu zarafatı İslam Hüseynovun xoşuna gəlməyib və ona xəbərdarlıq edib. Telefonda mübahisə başlayıb.

Onlar mübahisəni "həll etmək" üçün görüşüblər. Bakıda Nərimanov rayonu ərazisindəki görüşə İbrahim Sadıqov tək, İslam Hüseynov isə qardaşı ilə gəlib.

İbrahim Sadıqov təkbətək söhbət adı ilə İslam Hüseynovu qardaşının yanından ayırıb. Söhbət əsnasında onlar yenə də mübahisə ediblər və İbrahim Sadıqov üzərində gətirdiyi bıçaqla İslam Hüseynova çoxsaylı zərbələr endirib.

33 yaşlı İslam Hüseynov hadisə yerində dünyasını dəyişib

Elan olunan ittihamla özünü təqsirli bilən İbrahim Sadıqov məhkəməyə narazılığını da bildirib: "Orda bəzi ifadələr düzgün yazılmayıb. Mən bundan narazıyam. Amma bu cinayəti törətdiyimi etiraf edirəm".

İbrahim Sadıqovun vəkilləri cinayət işi materialları ilə tanış olmaq üçün vaxt istəyiblər.

Növbəti məhləmə prosesi iyunun 20-də davam edəcək.