BAKI, 22 may. TELEQRAF

Biz “İçərişəhər”i restoranların hesabına canlandıra bildik. Yadınızdadırsa, əvvəllər “İçərişəhər”ə insanlar gəlmirdi. Restoranların açılması ilə Bakıda bir mədəniyyət yarandı ki, “şənbə-bazar gəlin səhər yeməyimizi restoranlarda yeyək”.

Teleqraf xəbər verir ki, bu barədə İçərişəhər Dövlət Tarix-Memarlıq Qoruğu İdarə Heyətinin sədri Rüfət Mahmud WUF13 çərçivəsində keçirilən “Tarixi şəhərlərdə rəqəmsal transformasiya: ağıllı irs, məlumat əsaslı idarəetmə və inklüziv şəhər gələcəyi” adlı tədbirdə çıxışında deyib:

“Söhbət ondan getmir ki, gəlin bunu azaldaq. Məqsəd odur ki, restoranlar artmasın. Bunu bildirdim ki, obyektlərin limiti müəyyənləşdirək və biz bunu edirik. Lakin elə edək ki, “İçərişəhər”ə gələn qonaq artıq yalnız yemək üçün gəlməsin. Məqsədimiz budur ki, onun orada keçirdiyi vaxtı unudulmaz eləyək. Son bir il ərzində “İçərişəhər”də üç yeni muzey açılıb".

"Bunlar numizmatika muzeyi, miniatür sənət muzeyi və Bakı İlluziya Muzeyidir. Biz özümüz təhlil edirik ki, daha öncə “İçərişəhər” gələn insanlar iki saatdan artıq orada vaxt keçirmirdilər. Xarici turistlər də daxil olmaqla əksəriyyət gəlib gəzib, uzaqbaşı yemək yeyib gedirdilər. Lakin indi müşahidə edirik ki, qonaqlar 4-5 saat “İçərişəhər”də vaxt keçirirlər. Biz bunun üzərində işləməliyik ki, qonaqlar yalnız yemək üçün yox, başqa hansısa bir xidmətlər üçün də burada vaxt keçirsinlər”, - deyə o əlavə edib.