BAKI, 20 may. TELEQRAF

Gənclər artıq qlobal miqyasda ən innovativ ekoloji hərəkatların bir çoxuna rəhbərlik edirlər.

Teleqraf xəbər verir ki, bunu Milli Məclisin deputatı Nigar Arpadarai WUF13 çərçivəsində Azərbaycan pavilyonunda keçirilən "Plastik çirklənməsi ilə mübarizə: Yaşamaq üçün əlverişli şəhərlərin və dairəvi iqtisadiyyatın təşviqi" adlı tədbirdə deyib.

O bildirb ki, vətəndaş cəmiyyəti təşkilatları icmaları səfərbər etməkdə və təsisatların hesabatlılığını təmin etməkdə mühüm rol oynamağa davam edir:

"Özəl sektor da, xüsusilə qablaşdırma, istehsal və tədarük zəncirlərində öhdəliklərdən ölçülə bilən real fəaliyyətə keçməlidir. Hökumətlər isə dayanıqlı seçimləri əlçatan və iqtisadi cəhətdən səmərəli edən əlverişli siyasətlər və təşviq mexanizmləri yaratmalıdırlar. Parlamentin və eyni zamanda Ekologiya, energetika və təbii ehtiyatlar komitəsinin üzvü olaraq bildirmək istərdim ki, bu, qanunvericilikdə lazımi dəyişiklikləri edə bilmək üçün millət vəkilləri arasında müntəzəm olaraq müzakirə etdiyimiz əsas mövzulardan biridir.

Azərbaycan dayanıqlı şəhər inkişafı, yaşıl artım və ətraf mühitin mühafizəsini getdikcə daha çox prioritetləşdirir. Azad edilmiş ərazilərimizdə həyata keçirilən genişmiqyaslı polad (metal) yenidənqurma və inkişaf səyləri həm də ən başından müasir dayanıqlılıq prinsiplərini, daha ağıllı tullantı idarəetmə sistemlərini və daha yaşıl şəhərsalma yanaşmalarını inteqrasiya etmək üçün imkanlar yaradır. Bu vacibdir, çünki gələcəyin şəhərləri keçmişin səhvlərini təkrarlamamalıdır".

Deputatın sözlərinə görə, plastik çirklənmə israfçı inkişafın ən bariz əlamətlərindən biridir:

"Lakin bu, həm də bir fürsətdir, iqtisadiyyatımızı necə dizayn etdiyimizi, necə istehlak etdiyimizi, şəhərləri necə qurduğumuzu və sektorlar ilə sərhədlər arasında necə əməkdaşlıq etdiyimizi yenidən nəzərdən keçirmək üçün bir fürsətdir. Əgər buna nail olsaq, biz yalnız çirklənməni azaltmaqla kifayətlənməyəcək, həm də gələcək nəsillər üçün daha sağlam icmalar, daha yaşıl iqtisadiyyatlar, yeni iş yerləri, daha uzunmüddətli dayanıqlılıq və daha ləyaqətli şəhər həyatı yaradacağıq".