BAKI, 20 may. TELEQRAF

İcarə mənzil təminatına laqeyd yanaşmaqla biz şəhər əhalisinin əhəmiyyətli bir hissəsini diqqətdən kənarda qoymuş oluruq.

Teleqraf xəbər verir ki, bu sözləri Şəhər Siyasəti, Tədqiqat və Müdafiə üzrə Baş Menecer Xanım Deena Xəlil WUF13 çərçivəsində keçirilən "Aşağı Gəlirli Kirayə Mənzillərində Nə İşləyir? Ölçülən Həllər üçün Qlobal Həmyaşıd Öyrənmə Laboratoriyası" tədbirində deyib.

O bildirib ki, buraya, xüsusilə, azgəlirli ailələr, həssas qruplar, tələbələr, yeni ev təsərrüfatı quran gənc ailələr, miqrantlar, fəhlələri və qaçqınlar daxildir.

"Anlamalıyıq ki, icarə mənzil təminatı mütləq şəkildə mənzil sahibliyinə doğru gedən yolda keçid xarakterli bir mənzil forması deyil. Bəzən bu, bir çox həssas əhali qrupları üçün əsas mənzil forması və təminatıdır. İcarə mənzil təminatını yoxsullar üçün necə səmərəli edə biləcəyimizi düşünməliyik. Çünki hazırda bu sistem öz işinin öhdəsindən yaxşı gəlmir. İnsanları evdən çıxarılmaqdan, evsizlik riskindən qorumur; bu mənzillər hər zaman maddi cəhətdən münasib olmur. Çox vaxt gəlirlərin böyük bir faizi kirayə haqqını ödəməyə gedir. Fiziki struktur və mühit baxımından mənzillər həmişə yaşayış üçün tam yararlı olmur. "Habitat for Humanity" təşkilatında diqqəti icarə mənzillərinə yönəltmək üzrə apardığımız işlərin bir hissəsi olaraq, bu sahəni daha yaxşı anlamaq üçün bir sıra tədqiqatlar aparmaq və müzakirələr təşkil etmək qərarına gəldik. BMT-nin İnsan Məskənləri Proqramının (UN-Habitat) Ərəb Dövlətləri üzrə Regional Ofisi ilə birlikdə həyata keçirdiyimiz fəaliyyətlərdən biri təxminən 12 ərəb ölkəsinin xəritələndirilməsi oldu. Biz bu məlumatları regional mənzil hesabatında topladıq.

Tədqiq etdiyimiz ərəb ölkələrinin mütləq əksəriyyətində mənzil siyasətinin, xüsusilə, sosial mənzil siyasətinin icarədən daha çox mənzil sahibliyinə yönəldiyini aşkar etdik. Aydın oldu ki, icarə mənzillərində yaşayan ailələr və insanlar istər subsidiyalar, istərsə də sosial müdafiə baxımından hökumətdən çox az dəstək alırlar", - o vurğulayıb.

Onun sözlərinə görə, bu, problemin yalnız bir tərəfidir:

"İcarə mənzil təminatının dəstəklənməsi baxımından hökumətlərin və siyasi çərçivələrin qarşılaşdığı digər çətinliklər də var. Həmçinin ümumilikdə icarə mənzil ekosistemində problemlər mövcuddur. Bura mülkiyyətçilər və kirayəşinlər arasında mübahisələrin həlli mexanizmlərinin zəif olması da daxildir. Bu da ev sahiblərinin öz mənzillərini kirayəyə verməkdə tərəddüd etmələrinin əsas səbəblərindən biridir".