BAKI, 19 may. TELEQRAF

Hazırda bərpa olunan enerji qlobal elektrik enerjisi istehsalının təxminən 30 faizini təşkil edir və sürətlə artır. Şəhərlər üçün imkanlar çox aydındır.

Teleqraf xəbər verir ki, bunu BMT-nin Məskunlaşma Proqramının (UN-Habitat) keçmiş icraçı direktoru Maymuna Mohd Şarif WUF13 çərçivəsində keçirilən D-8 Yüksək Səviyyəli Enerji və Şəhər Dialoqu mövzusunda tədbirdəki çıxışında bildirib.

O bildirib ki, bu gün dünya əhalisinin 55 faizdən çoxu şəhərlərdə yaşayır və bu göstəricinin 2050-ci ilə qədər 70 faizə çatacağı gözlənilir:

“Eyni zamanda, şəhərlərin payına qlobal enerji istehlakının və karbon emissiyalarının 70 faizindən çoxu düşür. Bu isə bizə bir şeyi çox aydın göstərir: enerji keçidinin uğurlu olub-olmamasını məhz şəhərlər müəyyən edəcək. Lakin bu gün qarşılaşdığımız əsas problem həll yollarının olmaması deyil. Texnologiyalar, siyasətlər və irəliləyiş üçün zəruri impuls artıq mövcuddur.

Əsas boşluq şəhərləri necə planlaşdırdığımızla enerji sistemlərini necə qurduğumuz arasındakı uyğunluqdadır. Bu uyğunluq olmadan enerji keçidi qeyri-bərabər xarakter ala və şəhər icmaları arasında bərabərsizliyi daha da dərinləşdirə bilər”.

O əlavə edib ki, hazırda dünyada təxminən 675 milyon insanın elektrik enerjisinə çıxışı yoxdur:

“Buna baxmayaraq, biz “xalis sıfır emissiya” hədəflərindən danışırıq. Elektrik enerjisinə çıxışı olan bir çox insan isə onun qiymətini ödəməkdə çətinlik çəkir.

Xüsusilə D8 kimi sürətlə inkişaf edən regionların şəhərləri üçün bu məsələ yalnız texniki deyil, həm də siyasət və maliyyələşmə problemidir. Münasib qiymət dedikdə, təşviq mexanizmlərini necə qurduğumuz, maliyyəni necə səfərbər etdiyimiz və investisiyaları insanlara əlavə yük yaratmadan necə prioritetləşdirdiyimiz nəzərdə tutulur”.