BAKI, 2 aprel. TELEQRAF

“Nizami rayonu ərazisindəki qəzalı binaların sayı dəqiqləşdirilir”.

Bunu Teleqraf-a açıqlamasında Bakı şəhəri Nizami Rayonu İcra Hakimiyyətinin başçısı Coşqun Cəbrayılov deyib.

O bildirib ki, işlər Bakı Şəhər İcra Hakimiyyəti ilə mərkəzləşdirilmiş qaydada həyata keçirilir:

“Nizami rayonunda olan binalar Bakı Şəhər Mənzil-Kommunal Təsərrüfat Departamentinin balansındadır. Qəzalı binalarla bağlı atılacaq addımlar, bununla bağlı proqram Bakı Şəhər İcra Hakimiyyəti ilə mərkəzləşdirilmiş qaydada həyata keçiriləcək. Hazırda rayon ərazisində olan qəzalı binaların sayı dəqiq məlum deyil. Həmin binaların müəyyənləşdirilməsi, siyahısının hazırlanması prosesi davamlı xaraket daşıyır”.

Xatırladaq ki, martın 18-də Baş nazir Əli Əsədovun sədrliyi ilə ölkə ərazisində qəzalı vəziyyətə düşmüş çoxmənzilli yaşayış binaları ilə bağlı verilmiş tapşırıqların icra vəziyyəti, görüləcək işlər və digər əlaqəli məsələlərə dair iclas keçirilib. İclasda Fövqəladə Hallar Nazirliyinin, İqtisadiyyat Nazirliyinin, Maliyyə Nazirliyinin, Ekologiya və Təbii Sərvətlər Nazirliyinin, Dövlət Şəhərsalma və Arxitektura Komitəsinin, Bakı Şəhər İcra Hakimiyyətinin rəhbər şəxsləri iştirak edib, məruzələr dinlənilib.