BAKI, 5 aprel. TELEQRAF
Formula 1 üzrə Yaponiya Qran Prisinin stüardları təsnifat mərhələsində "Uilyams"dan Karlos Sayns və "Ferrari"dən Lüis Hemilton arasında baş vermiş insidentlə bağlı araşdırmalarını başa çatdırıblar.
Teleqraf xəbər verir ki, ispaniyalı pilot sürətli dövrənin ikinci seqmentində britaniyalı sürücünün ötmə əməliyyatına mane olub.
Araşdırmalardan sonra Sayns əsas mərhələnin sıralamasında üç mövqe itirmə cəzası alıb.
Hakimlər qeyd ediblər ki, "Uilyams"ın Hemiltonun pitə girmədən sürətli dövrə vurması ilə bağlı Saynsı xəbərdar etməyə zamanı olub. Ona görə də Sayns yarışa 12-ci deyil, 15-ci yerdən başlayacaq.
Qeyd edək ki, Yaponiya Qran Prisinin əsas mərhələsi aprelin 6-da keçiriləcək. Yarışın sıralama turunu "Red Bull"un üzvü Maks Ferstappen qazanıb.
