BAKI, 19 sentyabr. TELEQRAF
Rusiya Prezidenti Vladimir Putin ölkənin müdafiə-sənaye kompleksinin elmi, texnoloji və kadr potensialını artırmağa davam edəcəyinə əminliyini bildirib.
Teleqraf xəbər verir ki, Putin bunu Silah ustaları günü münasibətilə müdafiə-sənaye kompleksinin əməkdaşları və veteranlarına ünvanladığı təbrikdə bildirib.
“Əminəm ki, sizin peşəkarlığınız, seçdiyiniz işə sədaqətiniz və məsuliyyətiniz sayəsində müdafiə-sənaye kompleksi bundan sonra da elmi, texnoloji və kadr potensialını artıracaq, Silahlı Qüvvələri, hüquq-mühafizə orqanlarını və xüsusi xidmətləri ən müasir silah və texnika ilə təmin edəcək”, – Putin qeyd edib.
Rusiya lideri ölkəsinin dünya silah bazarında mövqeyini qoruyacağına əminliyini də ifadə edib.
Putin müdafiə sənayesi əməkdaşlarının əməyinin tarixi əhəmiyyət daşıdığını vurğulayıb və bu sahədə çalışanlara təşəkkürünü bildirib.
