BAKI, 18 sentyabr. TELEQRAF
Böyük Britaniyanın maliyyə naziri Con Hili Avropa İttifaqını Londonla münasibətləri yenidən qurmağa və ölkəni “Made in Europe” (“Avropada istehsal olunub”) proqramına daxil etməyə çağıracaq.
Teleqraf xəbər verir ki, bu barədə “Financial Times” məlumat yayıb. Hili sentyabrın 18-də Dublində keçiriləcək Aİ-nin İqtisadi və Maliyyə Məsələləri Şurasının qeyri-rəsmi toplantısında məsələni qaldıracaq.
“Made in Europe” siyasəti müdafiə, rəqəmsal texnologiyalar və sənaye sahələrində dövlət satınalmaları və digər dəstək mexanizmlərində Avropada istehsal olunan məhsullara üstünlük verilməsini nəzərdə tutur. London Britaniya şirkətlərinin bu imkanlardan kənarda qalmasının ölkə sənayesinə mənfi təsir göstərə biləcəyindən narahatdır.
Hili bildirib ki, Aİ ilə daha sıx əlaqələr Britaniya şirkətlərinin təchizat zəncirlərinə və müştərilərə çıxışını genişləndirə bilər. O, Dublindəki danışıqlarda “Avropa birliyinin gücləndirilməsinə” çağırış etməyə hazırlaşır.
Bununla belə, “Financial Times” yazır ki, Britaniyanın proqrama qoşulması ilə bağlı danışıqların asan keçəcəyi gözlənilmir. Nəşrin məlumatına görə, əsas maneələrdən biri Fransanın, digəri isə Avropa Parlamentinin mövqeyidir. “Made in Europe” məsələsindəki fikir ayrılıqları Britaniya-Aİ münasibətlərinə dair növbəti sammitin təxirə salınmasına da səbəb olub.
Con Hili 2026-cı il iyulun 20-dən Böyük Britaniyanın maliyyə naziri vəzifəsini tutur.
