BAKI, 10 sentyabr. TELEQRAF
Konqo Demokratik Respublikasının şərqindəki Bukavu şəhərindəki məktəbdə baş verən yanğın nəticəsində ən azı 14 uşaq həlak olub.
Teleqraf "France-Presse" agentliyinə istinadən xəbər verir ki, yanğın panikaya səbəb olub. Şagirdlər qapı və pəncərələrdən qaçmağa çalışıblar, bəziləri isə yuxarı mərtəbələrdən tullanıblar.
Yanğın cümə axşamı səhəri Bagira rayonundakı Ujamaa məktəbində uşaqlar sinifdə olarkən baş verib. Hadisədən sonra xəstəxanaya aparılan müəllim Simon Casamira "France-Presse" agentliyinə bildirib ki, dərsin ortasında birdən şagirdlərin qışqırığını eşidib: "Bəziləri yuxarı mərtəbələrdən tullandı, digərləri isə qapıdan qaçdı".
İzdiham zamanı uşaqlar yıxılıb və bir-birini tapdalayıb.
Yaxınlıqdakı klinikanın həkimi Kristof Ziqaşane təxminən 50 şagirdin və bir neçə müəllimin boğulma nəticəsində ağır vəziyyətdə xəstəxanaya gətirildiyini bildirib. O, 10 uşağın xəstəxanada, dörd uşağın isə hadisə yerində öldüyünü deyib. Qurbanların hamısı 10 yaşdan kiçik olub. İki müəllim də daxil olmaqla, daha 27 nəfər ağır vəziyyətdə Bukavudakı digər xəstəxanalara aparılıb.
Cənubi Kivu əyalətinin inzibati mərkəzi olan Bukavu, 2025-ci ilin fevral ayından bəri Ruandanın dəstəklədiyi M23 qrupunun nəzarəti altındadır. Şəhər Kivu gölünün sahilində yerləşir və yamaclarda sıx tikilmiş taxta evləri ilə tanınır, buna görə də burada müntəzəm olaraq yanğınlar baş verir.
Ötən ilin oktyabr ayında Bukavuda baş verən yanğın nəticəsində əksəriyyəti uşaq olmaqla 14 nəfər həlak olub. Mütəxəssislər Konqo Demokratik Respublikasının şəhərlərində tez-tez baş verən yanğınları yanğınsöndürmə avadanlıqlarının çatışmazlığı, sıx tikinti və elektrik şəbəkəsinə qanunsuz qoşulmalarla əlaqələndirirlər. Ötən həftə paytaxt Kinşasada toyda baş verən yanğın nəticəsində 12 nəfər həlak olub.
