BAKI, 26 iyun. TELEQRAF
Venesuelada baş verən güclü zəlzələ nəticəsində həyatını itirənlərin sayı 188 nəfərə, yaralananların sayı isə 1520-yə çatıb. Hazırda 157 nəfər itkin düşmüş hesab olunur.
Teleqraf xəbər verir ki, iyunun 24-ü axşam saatlarında ölkənin Yarakuy ştatında episentrləri bir-birindən təxminən 10 kilometr məsafədə yerləşən 7,2 və 7,5 bal gücündə iki zəlzələ baş verib.
Yeraltı təkanlar nəticəsində paytaxt Karakas da daxil olmaqla ölkənin bir sıra bölgələrində yaşayış və inzibati binalar dağılıb. Karakasın beynəlxalq Mayketiya hava limanı zədələndiyi üçün fəaliyyətini qismən dayandırıb. Hökumət ölkədə fövqəladə vəziyyət elan edib. Xilasetmə qrupları dağıntılar altında qalan insanların axtarışını davam etdirir.
Rəsmilərin məlumatına əsasən, La-Quayra ştatında azı 15 ev tamamilə dağılıb, zərər çəkmiş sakinlər isə müvəqqəti sığınacaqlara və hotellərə yerləşdirilir. Zədələnmiş yaşayış binalarında qaz təchizatı dayandırılıb, ölkə üzrə 30-a yaxın təkrar yeraltı təkan qeydə alınıb. Hökumət infrastrukturun bərpası üçün 200 milyon dollarlıq xüsusi fond yaradıb.
Rusiya, ABŞ, Avropa İttifaqı, Çin, Türkiyə, Braziliya və bir sıra digər ölkələr Venesuelaya humanitar və xilasetmə yardımı göstərməyə hazır olduqlarını açıqlayıblar. Rusiya səfirliyi isə ölkədə olan Rusiya vətəndaşları arasında ölən və ya xəsarət alanların olmadığı barədə məlumat yayıb.
