BAKI, 25 iyun. TELEQRAF
İtaliya və Fransa BMT Müvəqqəti Qüvvələrinin fəaliyyəti başa çatdıqdan sonra Livanı dəstəkləmək üçün koalisiya yaratmaq barədə razılığa gəliblər.
Teleqraf xəbər verir ki, bu barədə İtaliyanın Baş naziri Giorgia Meloni bildirib.
“Livandakı böhranda İtaliya və Fransa həlledici rol oynaya bilər. Livanda BMT missiyası ilin sonunda başa çatır və biz Livanı dəstəkləmək üçün koalisiya yaratmaq qərarına gəldik”, - deyə Meloni Fransanın Antibes şəhərində keçirilən hökumətlərarası sammitdə bildirib.
O əlavə edib ki, yaxın gələcəkdə Livana həsr olunmuş beynəlxalq konfrans keçiriləcək.
Onun sözlərinə görə, əsas məqsəd bölgədə təhlükəsizliyi təmin etməkdir: "İtaliya və Fransa həmişə Livanda mövcud olub və buna görə də ölkələrimizin beynəlxalq missiyaya rəhbərlik etməsi tamamilə təbiidir. Biz sıfırdan başlamayacağıq. Livan hakimiyyətinə ərazi üzərində inhisarı təmin etmək kimi əsas məqsədi qorumaq vacibdir. Aydın və strukturlaşdırılmış mandat vacibdir".
Livandakı sülhməramlı missiya BMT Təhlükəsizlik Şurasının qətnaməsinə uyğun olaraq, İsrailin 1978-ci ildə ölkəyə hücumundan sonra yaradılıb. Onun mandatı hər altı aydan bir yenilənir. Missiyaya 47 ölkədən təxminən 8200 nəfər cəlb edilib.
