BAKI, 19 fevral. TELEQRAF
Məşhur fiziklər Paolo Bassani və Joau Maqeyxo “Kainatı necə yaratmaq olar?” adlı məqalələrində rus riyaziyyatçısı Andrey Markovun ehtimal nəzəriyyəsindən istifadə edərək, dünyanın yaradılmasının Bibliya versiyasının riyazi təsvirini veriblər. Onların araşdırmasında kainat xaosdan, “Markov zəncirləri” nəzəriyyəsində isə fizika qanunlarının nizamlı şəkildə hərəkət etdiyi sabit zonalar ətrafında əmələ gəlir.
Teleqraf xəbər verir ki, elm adamları riyazi modelləşdirmədən istifadə edərək, Bibliyada təsvir olunan kainatın yaranma mexanizmini əsaslandırıblar.
Bibliyadakı Tanrının ümumi qəbul edilmiş antropomorfik obrazından fərqli olaraq, tədqiqatın müəllifləri nizamlanma prinsipini enerji və titrəyiş kimi təqdim edirlər.
Tədqiqatın nəticələrini təhlil etdikdən sonra Bassani və Maqeyxo kainatın Bibliya mətnində təsvir olunduğu kimi xaosdan əmələ gəldiyi qənaətinə gəliblər. Buna görə, xaotik mənzərədən sabit maddə, sabit sürətli işıq və bildiyimiz cazibə qüvvəsi ilə nizamlı bir dünya meydana çıxır.
Elm adamları Bibliyadakı uyğunsuzluqları da qeyd ediblər. Məsələn, Bibliyada Tanrı insan üzvləri olan antropomorf varlıq kimi görünür və kainat çərçivəsində, fiziklərin fikrincə, o, universal prosesləri təyin edən titrəyiş və enerjidir.
Tədqiqat həmçinin Pifaqorun təklif etdiyi harmoniya ideyasının aspektlərinin və təkamülün müxtəlif mərhələlərində fizika qanunlarının qeyri-sabit vəziyyətləri süzgəcdən keçirdiyini irəli sürən kanadalı fizik Li Smolinin təbii seçmə nəzəriyyəsinə toxunur. Fiziklər deyirlər ki, ətrafımızdakı dünyanın sabitliyinə baxmayaraq, dəyişikliklər qaçılmazdır, hətta kainat yenidən xaotik vəziyyətə qayıda bilər.
