BAKI, 5 oktyabr. TELEQRAF
Azərbaycan cüdoçusu Ruslan Paşayev Bakıda keçirilən dünya çempionatında ilk qələbəsini qazanıb.
Teleqraf xəbər verir ki, 66 kq çəki dərəcəsində yarışan idmançı 1/16 final mərhələsində Türkmənistan təmsilçisi Serdar Rəhimovu mübarizədən kənarlaşdırıb.
R.Paşayev rəqibinə qalib gələrək 1/8 final mərhələsinə vəsiqə əldə edib.
Qeyd edək ki, oktyabrın 11-nə qədər davam edəcək yarışda 93 ölkədən 622 cüdoçu – 335 kişi və 287 qadın mübarizə aparacaq. Azərbaycanı fərdi yarışlarda 13 çəki dərəcəsində 24 cüdoçu – 17 kişi və 7 qadın təmsil edəcək. Yığmamız həmçinin oktyabrın 11-də keçiriləcək qarışıq komanda yarışında da çıxış edəcək.
