Bakı, 25 fevral. TELEQRAF

Sosial xidmətlərə olan tələbatın qiymətləndirilməsi və müəyyənləşdirilməsi qaydası dəyişir.

Teleqraf xəbər verir ki, bu, “Sosial xidmət haqqında” qanuna təklif edilən dəyişiklikdə öz əksini tapıb.

Layihəyə əsasən, sosial xidmətin göstərilməsi barədə müraciət müvafiq icra hakimiyyəti orqanına daxil olduğu gündən 5 iş günü ərzində şəxsin (ailənin) sosial xidmətə olan tələbatının qiymətləndirilməsi və müəyyənləşdirilməsi üçün sosial işçiyə ünvanlanacaq. Qüvvədə olan qanunvericiliyə əsasən, həmin müddət müraciətin daxil olduğu gündən sonra 5 iş günüdür.

Digər dəyişikliyə əsasən, şəxsə (ailəyə) dövlət büdcəsinin vəsaiti hesabına sosial xidmətin göstərilməsi və ya sosial xidmətin göstərilməsindən imtina edilməsi barədə qərar sosial işçi tərəfindən hesabatın təqdim edildiyi gündən 5 iş günü ərzində müvafiq icra hakimiyyəti orqanı tərəfindən qəbul ediləcək. Qüvvədə olan qanunvericiliyə əsasən, həmin müddət hesabatın təqdim edildiyi gündən sonra 5 iş günüdür.

Qüvvədə olan qanunla sosial işçi tərəfindən sosial xidmətin formasını, növünü, sosial xidmətin göstərilməsi yeri və müddətini özündə əks etdirən sosial xidmətə olan tələbatın qiymətləndirilməsi və müəyyənləşdirilməsi üzrə hesabat və şəxsə (ailəyə) sosial xidmət göstərilməsinə dair fərdi plan hazırlanır. Qanun layihəsində sosial işçi tərəfindən şəxsə (ailəyə) sosial xidmət göstərilməsinə dair fərdi planın 5 iş günü ərzində hazırlanması təklif edilir.

Məsələ bu gün Milli Məclisin Əmək və sosial siyasət komitəsində müzakirəyə çıxarılıb.