BAKI, 3 aprel. TELEQRAF
Almaniya xarici işlər naziri Annalena Berbok İsrail Baş naziri Benyamin Netanyahunun Beynəlxalq Cinayətlər Məhkəməsinin (BCM) onun həbsinə dair orderinə baxmayaraq Macarıstana səfərini pisləyib.
Teleqraf xəbər verir ki, o, bunu beynəlxalq hüququn pozulması kimi qiymətləndirib.
“Bu, beynəlxalq cinayət hüququ üçün pis gündür”, - Berbok Brüsseldə NATO xarici işlər nazirlərinin görüşündə bildirib.
Xatırladaq ki, bu, Netanyahunun keçən il BCM-nin onun və o vaxtkı müdafiə naziri Yoav Qallant barəsində Qəzza zolağında hərbi cinayətlər törətməkdə şübhəli bilinərək həbs qərarı verdikdən sonra Avropaya ilk səfəri olacaq.
Macarıstan BCM-nin üzvü olsa da, beynəlxalq məhkəmənin qərarını icra etməyəcəyini bildirərək, İsrail baş nazirinə təhlükəsiz səfər vədi vermişdi. Üstəgəl, Macarıstan Baş naziri Viktor Orban bu gün Budapeştdə Netanyahu ilə görüşündə ölkəsinin BCM-dən çıxma prosesinin başladığını açıqlayıb.
