BAKI, 22 avqust. TELEQRAF

ABŞ Demokrat Partiyasının nümayəndələri noyabrda keçiriləcək aralıq seçkilərində Nümayəndələr Palatasında çoxluq qazansalar, Donald Tramp administrasiyasının müxtəlif sahələrdəki fəaliyyətini araşdırmağa hazırlaşırlar.

Teleqraf xəbər verir ki, bu barədə “The Wall Street Journal” (WSJ) mənbələrə istinadən məlumat yayıb.

Nəşrin məlumatına görə, demokrat qanunvericilər ilkin olaraq təxminən 12 istiqamət üzrə araşdırma aparmağı planlaşdırırlar.

Bunlar arasında ABŞ-nin İrana qarşı hərbi əməliyyatı, Donald Tramp və ailə üzvlərinin biznes fəaliyyəti, Ağ Evdə bal zalının tikintisi, Trampın maliyyəçi Ceffri Epşteynlə əlaqələri, eləcə də ABŞ immiqrasiya qurumlarının əməkdaşlarının fəaliyyəti var.

WSJ yazır ki, demokratlar Trampa qarşı impiçment prosedurunun başlanıb-başlanmaması məsələsində hələ yekun mövqe müəyyən etməyiblər. Partiya daxilində bununla bağlı fikir ayrılıqları qalır.

ABŞ administrasiyasının yüksək vəzifəli rəsmilərindən biri nəşrə bildirib ki, Ağ Evin hüquqşünasları nazirləri və müşavirləri Konqresdən ifadə vermək tələblərinin gələ biləcəyi barədə artıq məlumatlandırıb və belə hallarda necə davranmalı olduqlarına dair təlimatlar veriblər.

Nəşr qeyd edir ki, demokratların Nümayəndələr Palatasında çoxluq əldə etməsi üçün cəmi bir neçə əlavə mandat qazanması kifayətdir. Respublikaçılar isə aşağı palataya nəzarəti itirmək ehtimalından getdikcə daha çox narahatdırlar.

Senat uğrunda mübarizənin nəticəsinin isə hazırda proqnozlaşdırılmasının çətin olduğu bildirilir.