BAKI, 20 may. TELEQRAF

Artıq bir neçə ildir ki, Azərbaycan hökuməti qlobal ictimaiyyətə dünyanın gələcəkdə necə görünməli olduğu barədə düşünməyə kömək edir.

Teleqraf xəbər verir ki, bunu UNIDO-da Enerji Sistemi və Sənaye Dekarbonizasiyası Bölməsinin rəisi Rikkardo Saviqliano WUF13 çərçivəsində keçirilən “Şəhər-Sənaye-İqlim Əlaqəsində Mənzil və Binaların Dekarbonizasiyası” mövzusunda tədbirdəki çıxışında bildirib.

O qeyd edib ki, UNFCCC icması ilə əməkdaşlıq, COP29, eləcə də ÜST və UN-Habitat ilə əməkdaşlıq – bunlar hamısı Azərbaycan hökumətinin keçmişə hörmət etmək, indini yaşamaq, həm də gələcəyə baxmaq istiqamətində fəallığının göstəricisidir.

R. Saviqliano əlavə edib ki, insanlığın ən çox istifadə etdiyi məhsul sudur: “Biz sudan hər şey üçün istifadə edirik – həyatımız, sanitariya, istehsal üçün. İnsanlığın adambaşına ikinci ən çox istifadə etdiyi məhsul isə betondur. Yəni cəmiyyətlərimizin inkişafını beton istifadəsindən ayıra bilmərik.

Hazırda dünyada hər ay Nyu-York böyüklüyündə bir şəhər tikilir. Bu tendensiya 2050-ci ilə qədər davam edəcək. Şəhərlərdə artan əhalini təmin etmək üçün lazım olan infrastrukturun 70 faizi hələ də qurulmalıdır. Bu yalnız mənzil tikintisi deyil, həm də insanların hərəkətini təmin etmək, xidmətlər göstərmək, suyun paylanması, suyun təmizlənməsi və sair kimi infrastrukturun yaradılması deməkdir.

Bütün bu infrastrukturlar bu və ya digər şəkildə sement, beton və polad istifadəsinə əsaslanacaq. Lakin problem ondadır ki, əgər sement sənayesi bir ölkə olsaydı, o, CO₂ emissiyalarına görə dünyada üçüncü ən böyük emissiya edən ölkə olardı. Bu isə sənaye baxımından çox böyük bir çağırışdır və dediyimiz kimi, inkişaf baxımından da ciddi problemdir”.