Bakı, 2 aprel. TELEQRAF

"Mübariz İbrahimov şəhid olduqdan sonra deyirdi ki, biz də onun yolunu getməliyik".

Teleqraf xəbər verir ki, bunu Aprel şəhidi, pilot mayor Təbriz Musazadənin anası Tovuz Musazadə deyib.

O bildirib ki, T.Musazadə toya getmək bəhanəsiylə anası ilə sağollaşıb:

"Təbriz olduqca qəhraman və qorxmaz idi. Mübariz İbrahimov şəhid olduqdan sonra deyirdi ki, biz də onun yolunu getməliyik. Bildirirdi ki, şəhidlik hamıya qismət olmur. Martın 30-da məni aldatdı ki, Lənkərana iş yoldaşımın toyuna gedirəm. Mənimlə sağollaşdı. Bir gün sonra zəng etdim, soruşdum ki, nə vaxt qayıdacaqsan, dedi, ana, məndən narahat olma, hər şey qaydasındadır və gəlməyəcəm. Həmişə ona deyirdim ki, getmə döyüşə. Evin tək oğlusan, atan xəstədir. O da buna əsəbiləşirdi. Deyirdi ki, məgər mən qorxağam ki, döyüşlərdən qaçım? 20 ildir hərbidəyəm. Ən böyük arzusu da uşaqlarının yaxşı təhsil almasıdır. Ondan iki oğlan uşağı yadigar qalıb".