BAKI, 2 aprel. TELEQRAF

“Müasir dövrdə texnika cəmiyyətimizin bir hissəsi olmasına baxmayaraq, istər nitq əlilliyi olan, istər nitq əlilliyi olmayan uşaqların uzun müddətli televizor, telefon, planşet və s. kimi avadanlıqlardan istifadəsi onların dil bacarıqlarının inkişafına mənfi təsir edir”.

Teleqraf xəbər verir ki, bunu Səhiyyə Nazirliyinin rəsmi İnstaqram hesabında canlı yayımda Səhiyyə Nazirliyi Psixi Sağlamlıq Mərkəzinin loqopedi Aygün Ələkbərova deyib.

Onun sözlərinə görə, 0-3 yaş arası uşaqlara ümumiyyətlə texnikalardan istifadə məsləhət görülmür:

“3 yaşdan yuxarı uşaqlarda, xüsusilə autizm sindromlu uşaqlarda isə belə texnikalardan istifadə məhdud saatlarda olmalıdır. Mavi ekrana erkən məruz qalma nitqin inkişafını ləngidir və ünsiyyət problemlərini ağırlaşdırır. Kiçik yaşlarından bu kimi texnikalardan istifadə edən bir çox uşaqlar gələcəkdə mətnləri, şerləri, hekayələri dinləyərkən, sözlərin cümlələrlə əlaqələndirilməsi, mənalarının başa düşülməsi, eləcə də yadda saxlamaqda çətinlik çəkirlər. Nəzərə alsaq ki, cizgi filmlərindəki proseslər rəngarəng olduğundan autizm sindromlu uşaqlar gipnotik vəziyyətə düşürlər. Bu zaman kommunikativ funksiya öz fəaliyyətini ləngidir, sonradan inkişafdan qalmaya da səbəb ola bilər”.

A.Ələkbərova sonda qeyd edib ki, 7-8 yaş arası uşaqlarda korreksiya işi zamanı vaxt bölgüsü düzgün aparıldıqda nitqin alternativ inkişafında telefon, planşet və s. kimi texnikalardan istifadə mümkündür:

“Korreksiyaedici iş zamanı interaktivlik qorunmaqla dialoji nitqin, alıcı və ifadəedici dilin inkişafına müsbət təsiri müşahidə olunur”.